'JOMPLANGANING' PENDAFTARAN CPNS 2013

Namung dipunpundhut 0,008% saking kathahipun pandaftar

Yogyakarta – Pandaftaran CPNS (Calon Pegawai Negeri Sipil) tahun 2013 sampun dipunumumaken dening Pemerintah Daerah, boten kesupen ugi Pemerintah Daerah Daerah Istimewa Yogyakarta (Pemda DIY) ingknag samenika sampun ngedalaken pengumuman pandaftaran CPNS menika. Pawarta menika ketingal sanget bilih dados waosan paling nginggil wonten ing antawisipun masyarakat, utamanipun tiyang-tiyang ingkang anggadhahi prakarya ingkang taksih jangkepi anggenipun tumut pandaftaran CPNS menika. Bidang ingkang dipunbika inggih menika Tenaga Guru ingkang dipunudhar dados 4 jabatan, Tenaga Kesehatan ingkang dipunudhar dados 13 jabatan, saha Tenaga Teknis ingkang dipunudhar dados 32 jabatan.

Pandaftaran CPNS wonten ing daerah Yogyakarta dipunadakaken wonten ing Youth Centre Jl. Kebon Agung, Tlogoadi, Mlati, Sleman. Jadwalipun dipunwiwiti saking pandftaran inggih menika wiwit tanggal 5 September dumugi 19 September 2013. Salajengipun jadwal pangempalan prasaratan saha verifikasi tanggal 5 September dumugi 20 September 2013. Lajeng samenika sampun kalampahan wonten ing tahap salajengipun inggih menika pengumuman ingkang lolos seleksi administrasi tanggal 24 September 2013 saha pamundhutan kartu ujian tanggal 25 dumugi 27 September 2013. Salajengipun inggih menika ujian ingkang dipunadakaken tanggal 3 November 2013, ananigng jadwal menika taksih saged gantos malih. Lajeng ingkang dados pungkasaning reroncenipun pandaftaran CPNS inggih menika wewaranipun hasil ujian ingkang sawetara dipunjadwalaken tanggal 14 Desember 2013.

Saking jadwal wonten ing inggil menika, samenika sampun kalampahan dumugi wewaran hasil lolos administrasi saha pamudhutan kartu ujian. Pandaftar ingkang lolos seleksi administrasi kala wingi kacatet wonten 13.492 pandaftar, inggih menika 637 wonten ing bidang Tenaga Guru, 3.098 wonten ing bidang Tenaga Kesehatan, saha 9.757 wonten ing bidang Tenaga Teknis. Saking kathahipun pandaftar menika Pemda DIY sampun maringi pirsa wiwit wewaran pandaftaran CPNS menika dipunwedalaken, bilih ingkang dipunpundhut namung 120 tiyang kemawon. Jumlah menika saged dipunetang bilih ingkang dipunpundhut namung 0,008% saking tiyang ingkang kadaftar dados pandaftar CPNS samenika.

Saking asilpun wewaran kala wingi tanggal 27 September 2013 wonten pirang-pirang jabatan ingkang katingal boten wajar. Tegesipun, antawisipun pandaftar saha ingkang dipunpundhut bedanipun jomplang ageng sanget. Jomplangan ingkang katingal sanget inggih menika jabatan Instruktur Bahasa dipuntumuti 1.491 pandaftar ananing ingkang dipunpundhut namung 2 tiyang kemawon, lajeng wonten ugi jabatan Penyuluhan Perindustrian dan Perdagangan ingkang dipuntumuti 1.564 ananging ingkang dipunpundhut namung 3 tiyang kemawon, ugi sami kaliyan jabatan Pemeriksa Pajak, Pranata Komputer, saha Perawat D3 ingkang dipuntumuti langkung saking 1.000 pandaftar ananging namung dipunpudhut paling kathah 5 tiyang.

Analisis samenika jomplang kaliyan jabatan sanesipun ingkang dados kosokbalenipun. Kadosta jabatan Psikologi Klinis ingkang dipuntumuti dening 14 pandaftar lajeng dipunpundhut 2 tiyang, lajeng jabatan Entomolog Kesehatan ingkang dipuntumuti dening 8 pandaftar lajeng dipunpundhut 2 tiyang, saha ingkang pungkasan ingkang menawi saged dados kabegjanan kangge ingkang daftar inggih menika jabatan Dokter Spesialis Paru-paru ingkang namung dipuntumuti dening satunggal pandaftar kamangka ingkang dipunpundhut ugi namung satunggal tiyang. Pandaftar jabatan Dokter Spesialis Paru-paru menika inggih menika Ngatwanto saking Bentak, Kec. Sidoharjo, Kab. Sragen. (Fithria Nur Halimah-11205244024)