KHAYANGAN API, GENI ABADI

Sami kalian saben-saben dhaerah, Bojonegoro, salah satunggaling kabupaten wonten ing Jawa Timur ugi anggadhahi papan wisata piyambak. Papan wisata alami ingkang  dados andalan warga Bojonegoro menika mapan wonten ing Desa Sendangharjo, Kecamatan Ngasem. Papan wisata ingkang wonten ing tengahing alas menika kawastanan Khayangan Api, papaning geni abadi. Geni ingkang wonten ing Khayangan api ugi dados sumber geni ingkang ageng piyambak sa-Asia Tenggara saha boten saged pejah. Geni menika alami medal saking lebeting bumi.

Ahli geologi pitados bilih geni ingkang medal wonten ing sitining Khayangan Api menika kabentuk saking gas bumi ingkang papaninpun kirang saking 3.000 meter wonten ing ngandhaping siti. Kabupaten Bojonegoro piyambak ugi dados dhaerah pangasil minyak ingkang ageng piyambak se-Asia amargi sitinipun ngandhut minyak bumi utawi dipunwastani Emas Hitam. Erick Firdaus, Kepala Bagian Sumber Daya Alam, Bagian Penerangan Umum Kabupaten Bojonegoro medharaken bilih jaman rumiyen nate wonten gempa bumi ageng ingkang dadosaken siti wonten ing Sendangharjo retak. Dadosaken gas ingkang wonten ing lebeting bumi minggah lajeng nyebar kalian udara sekitar. Wonten ing salah satunggaling dinten, petir nyamber sumber gas menika lajeng dumugi samenika nyumbar saha boten saged pejah. Wisata Khayangan Aapi dipuntitadosi dados papaning Mbah Kriya Kusumo utawi Mbah Pandhe inggih menika tukang damel pusaka saking Kerajaan Majapahit. Wonten ing kilenipun sumber geni Khayangan Api, wonten lumpur ingkang kadose umub, ananging menawi dipuncepeng menika anyes. Menika lumpur belerang ingkang dumugi samenika taksih dipunginakaken kangge ngumbah keris utawi pusaka-pusaka kados dene Mbah Kriya rumiyen.

Khayangan Api dados papan sakral miturut masarakat Bojonegoro umumipun, Sendangharjo kususipun. Geni wonten ing Khayangan api boten saged asal dipunpundhut ananging kedah ngawontenaken gendhing-gendhingan kadosta eling-eling, wani-wani, saha gunungsari ingkang dados gendhing remenanipun Mbah Kriyo. Salah satunggaling ritual wonten ing Khayangan Api inggih menika upacara Jumenengan Ngarsadalem Hamengku Buwono X. Geni obor PON XV ugi dipunpundhut saking geni Khayangan Api. Nate wonten panaliten (2011) wonten ing Khayangan api dening ahli arkeolog Universitas Indonesia amargi juru kuncinipun nemokaken watu kathah ingkang kadose bentuk pondasi. Sasampunipun dipungali, katingal pondasi (kados) candi.panaliten menika taksih dereng rampung.

Kangge mlebet wonten ing Khayangan Api kedah ngliwati alas saha marginipun tebih saking dalemipun para warga. Wekdal samenika Khayangan Api sampun dipundandani mawi gapura saha gazebo-gazebo utawi omah-omahan kados dene papan lesehan. Sedaya titikan sejarah sampun dipunpageri saha dipunparingi tanda. Tiyang ingkang rawuh wonten ing Khayangan Api boten namung turis lokal ananging ugi turis manca.